چلتے ہو تو لاہور کو چلیے (قسط دہم)۔

اسی  سوچ  میں گم تھا  کہ  میں نے آپا  جی کی زمزم  سے دھلی  نگاہیں اپنے اندر اترتی ہوئی  پائیں۔    ان کو اپنی طرف دیکھتا پا کر میں  چونکا تو انہوں نے   بڑی شفقت اور پیار سے  مجھے اپنے قریب بلایا ۔  اور  میں بے خودی کے عالم  میں آپا  جی کی طرف کھنچا چلا گیا۔  ارسل ابھی تک ان کے قدموں  سے لپٹا بیٹھا تھا،  میں نے  اسے ہاتھ  لگا کے  اٹھنے کا  اشارہ دیا اور  خود  بانو آپا   سامنے بکھری  جنت میں داخل ہو کر ان کے قدموں پر ڈھیر  ہو گیا۔تیس سال سے  بھٹکتے  جوگی  نے     ماں  جی  کی  گود  میں  سر جھکا دیا۔  بانو آپا کا  شفقت اور ممتا سے  لبریز  پاکیزہ ہاتھ  اپنے سر  پر محسوس  ہوا ۔  جی تو چاہا  کہ  دھاڑیں مار مار کے رونا شروع کر دوں  مگر  اتنا  شفیق ہاتھ  میرے سر پر تھا  کہ رو  بھی نہ سکا ۔  روتا بھی تو کس منہ سے  روتا۔  ۔۔۔؟

  کتابوں  میں پڑھا ہے جب آقائے  نامدار  تاجدارِ کائنات   معراج پر  تشریف لے گئے  تھے ، تو  وقت کی  لگامیں  کھینچ لی گئیں تھیں ۔سیر افلاک  اور  "قابَ قوسین  " کے  اعزاز  سے سرفراز  ہونے  کے  بعد  جب واپس  عالم  ِ خاکی میں تشریف لائے  تو  در مبارک  کی  کنڈی  ابھی ہل  رہی تھی اور وضو  کا پانی  زمین پر  ابھی ویسے ہی  بہہ رہا تھا۔ 

اللہ جھوٹ نہ بلوائے  جتنی  میری  اوقات  ہے اس حساب سے  تو یہ میری  معراج تھی۔  

تیری معراج  کہ تو لوح و قلم  تک پہنچا

میری معراج  کہ میں تیرےقدم تک پہنچا

رسول  اللہ صلی اللہ  علیہ  وآلہ  وسلم  کو  اللہ  تعالیٰ نے  بلایا  ، غلام ِ   رسول  اللہ  کو  اللہ  کی  برگزیدہ  بندی  بانو آپا  نے بلایا  ۔    رسول  اللہ صلی اللہ  علیہ  وآلہ  وسلم  کو  جبرئیل  علیہ السلام سفید   براق  لے کر  لینے  کو آئے تھے ، غلام  ِ رسول اللہ  کیلئے افتخار احمد  عثمانی  صاحب سفید  کار  لے کر  لینے کو آئے ۔    رسول  اللہ صلی اللہ  علیہ  وآلہ  وسلم   کو جنت  کی سیر  کرائی گئی  اور  غلام  ِ  رسول اللہ  کو  بانو آپا کے قدموں میں بچھی  جنت  (داستان سرائے)میں  سیر کرائی گئی۔قرآن مجید  میں اللہ تعالیٰ خود  گواہی دے رہا  ہے  کہ میرے آقارسول  اللہ صلی اللہ  علیہ  وآلہ  وسلم    کو "قابَ قوسین ِ او ادنیٰ"(ایک  کمان  کے دونوں سروں  جتنا  قریب  بلکہ اس سے  بھی تھوڑا کم)کا تاج پہنایا  گیا۔  اور حاضرین گواہ  ہیں کہ   غلامِ  رسول اللہ  جب  بانو آپا  کے سامنے  زانوئے ادب تہہ  کر  کے  ان کی گود میں  جھکا  اور  ان کا دستِ شفقت اس  کے سر پہ تھا  تو  یہ  مقامِ "قابَ قوسینِ او ادنیٰ" کی  ایک  خاکی  تمثیل  تھی۔

دیکھنے  والوں  کی دانست  میں جوگی چند  ثانیے  بانو آپا کی گود میں جھکا رہا ۔  لیکن  

کوئی میرے دل سے  پوچھے تیرے تیرِ نیم کش کو

ان چند لمحوں میں مجھ پر  کئی عالم  گزر گئے ،  میرے  لیے وقت  رک چکا تھا ،  اور سیر افلاک  جاری تھی۔ البتہ  جب واپس  لوٹا  تو معلوم ہوا  کہ  بانو آپا  کا دست مبارک میرے سر پہ ہے،  اور  صوفے پہ بیٹھا  ارسل  ویسے  ہی  مسکرا رہا ہے۔  ساتھ  بیٹھی  محترمہ عشرت صاحبہ ماں  بیٹے کے  اس پیار کو دیکھ رہی ہیں ،  افی صاحب  جو  دروازہ  کھول کے اندر داخل  ہو رہے تھے  ابھی دروازے  سے دو تین قدم  ہی آگے آئے  ہیں۔پس ثابت ہوا  کہ یہ جوگی  عرف  چھوٹے غالب کی معراج ہی تھی۔  الحمد اللہ  رب العلمین

میں سیدھا ہو کے  وہیں آپا  جی کے قدموں  میں پسر گیا۔  اتنے میں افی صاحب قریب  آ چکے تھے  اور  آتے ہی  انہوں نے  پھر سے میرا (تفصیلی)تعارف شروع کر دیا۔ کہ یہ لودھراں  سے  تقریباً ڈیڑھ ہزار کلومیٹر کا  سفر کرکے صرف آپ کی  زیارت کیلئے  آج ہی  آیا  اور راتوں  رات واپس بھی  چلا جائے گا، غالب  پر اس کی بڑی تحقیق  ہے ،  اور آگے بہت سی   نہایت ہی  مبالغہ  آمیز  تعریفیں  جن کا لکھنا یہاں مناسب نہیں، البتہ  افی صاحب کے حسنِ ظن  اور ذرہ نوازی  پر  بہت بہت  شکریہ  اور جزاک اللہ ۔

پھر افی صاحب  نے کہا  چلو بھئی  ارسل  اور چھوٹے !آپا جی کے  ساتھ تصویر  بنانے لگا ہوں، میں نے ارسل  کو  صوفے  سے  اٹھا  کر کہا  کہ    ایک سائیڈ  پر ہو جا بابو!! میرے  اور میری  محترم  آئیڈیل  بانو آپا  کے درمیان کوئی  تیسرا نہ ہو۔  اس پر  بانو  آپا کے  لبوں  پر پھیلی دل نشین  مسکراہٹ گہری ہو گئی اور حاضرین ہنس پڑے۔  ارسل  ہنستا  ہوا  اٹھ   گیا اور بقول  غالب:غیر از  نگاہ کوئی  حائل نہ رہا۔ اب  آپا  جی کے ساتھ والے  صوفے  پر صرف  میں براجمان تھااور  افی صاحب  میری  تصویریں  بنانے لگے۔پھر  افی صاحب  اور ارسل  مبشر  بھی  میرے ساتھ آ کے  بیٹھ گئے  اور  گپ شپ شروع ہو گئی ۔  میں  آپا  جی کی  طرف اتنا محو  تھا کہ  جناب  اثیر احمد  خان صاحب  مجھ سے کوئی بات کرتے رہے  مجھے  پتا ہی نہ چلا ، وہ تو  جب افی صاحب نے ادھر  متوجہ کیا  تو  دیکھا  کہ  محترمہ  عشرت صاحبہ  میری  بانو آپا  کی طرف محویت پر ہنس  رہی تھیں  اور  اثیر احمد  خان صاحب  مجھ سے کچھ کہہ رہے تھے ۔  واللہ  کچھ ایسی  بے خیالی  تھی کہ  سن اثیر صاحب کو رہا تھا  لیکن سمجھ کچھ  نہ آیا  کہ کیا کہہ رہے ہیں، بس ان کے ہونٹ ہلتے  نظر آرہے تھے ۔  آخر میں نے  معذرت کر لی کہ  اس وقت  میں آپا  جی کے سائے  میں بیٹھا  ہوں  مجھ پر  جتنا  پریشر ہے  وہ  مجھے پتا ہے ، اس لیے نہ  مجھے  کچھ سمجھ آ رہا ہے نہ بولا جا رہا ہے۔ اس بات  پر ایک بار پھر  سب ہنس پڑے ۔       

سب نے مجھے میرے  حال پر چھوڑ  دیا ، پھر  بانو  آپا  اور فدوی  ایک دوسرے  کی طرف متوجہ ہو گئے ۔  میں نے آپا  جی کو  بتایا  کہ  آپ  کی تخلیق  راجہ  گدھ مجھے کتنا پسند ہے  اور آپ  کا ناولٹ "ایک دن" تو میرا پسندیدہ  ترین ہے ،  وہ میں نے اتنی بار پڑھا ہے  کہ  ا ب تو حفظ ہو چکا ہے۔ آپا  جی مونا لیزا  والی  مسکراہٹ سے نوازتیں  اور فرماتیں "مہربانی"۔  آپا  جی نے  مجھے  اپنی  وراثتی زمین  کے بارے میں بتایا  جو کہ  ضلع لودھراں کے نواح  میں چک 92  اور  چک 95 میں واقع ہے ، اور  جس پہ فراڈئیوں  نے  قبضہ  کیا  ہوا  ہے۔ میں نے  آپا جی کو تسلی  دی کہ  میں چک  92 اور 95  جا کر حالات  معلوم کروں گا۔  جس پر آپا جی نے مجھے دعاؤں سے نوازا۔  میں نے آپا  جی سے کہا  کہ "آپ  میرے آئیڈیل  ادیبوں  میں سر فہرست ہیں، میرے اور میرے قلم کے  حق میں بھی دعا کریں"۔  آپا  جی نے  مجھے فرمایا:۔ "بے فکر  رہو بیٹا!" اور میرے حق میں  دعا فرمائی۔اس کے علاوہ  بہت سی  باتیں ہوئیں ماں بیٹے میں،  جن کا تذکرہ  ضروری نہیں۔

اس دوران  فوٹو گرافر  ہماری تصویروں  پر تصویریں  بنائے جا رہا تھا۔  افی صاحب آپا جی  سے مخاطب  ہوئے اور بتایا  کہ  :۔"آپا جی ! یہ آپ کا اتنا مداح ہے  کہ کہتا تھا ایک  بار آپا  جی کی  خدمت میں حاضری  نصیب  ہو جائے پھرچاہے موت آ جائے  میں مرنے کو تیار ہوں۔" آپا جی  نے  میری  طرف ممتا  بھری  ڈانٹنے  والی نگاہوں سے دیکھا اور  ایک  علامتی  سی چپت  کے طور پر  میرے گال کو پیار سے  چھوا  اور فرمایا:۔ "ایسا  نہیں کہتے بیٹا ۔ زندگی  جینے کیلئے ملی ہے ، اسے چیلنج سمجھ کر  جیو۔" اور  پھر فرمایا کہ:۔"بیٹا  جاب  کی فکر نہیں کرنی ،  جاب مل جائے گی۔" میں  نے  ہنس کے  ان کا ہاتھ پکڑا  اور  کہا:۔ "آپا  جی !  بھاڑ میں جائے جاب۔  آپ سے ملاقات میرے لیے لائف  اچیومنٹ  ایوارڈ ہے۔بس  آپ کا پیار پا لیا  ہے تو   زندگی سے  بھی راضی اور اللہ سے بھی راضی ہو گیا" اور حاضرین  ہنس پڑے  ۔

شام  پانچ بجے سے  یہ محفل شروع  ہو ئی تھی  اور اب رات کے دس  بجنے کو  تھے ۔  آفرین ہے  عالی  جناب محترمہ  بانو قدسیہ آپا  جی  پر  کہ چھیاسی  سال  کی عمر  اور اتنی  ضعیفی کے باوجود   اتنی دیر سے  ہمارے درمیان   تشریف  فرما رہیں ۔  اس  عرصے میں ، ایک  بار  بھی  انہیں اکتائے ہوئے  نہ دیکھا، ایک لمحے کو بھی اس درخشاں  پیشانی پر  ہلکی سی شکن نے  بھی نہ جھانکا تھا۔ بے شک اللہ  والوں کے  رنگ ہی نیارے ہیں۔ 

میں ابھی وہیں بیٹھا تھا  کہ دو لوگوں  نے  مجھ سے میرا فون نمبر مانگا، اور میں نے  دیکھے بغیر دے  دیا،  کیونکہ  آنکھیں تو  آپا جی  پر مرکوز تھیں۔  پھر  محترمہ  عشرت  صاحبہ  نے آپا  جی سے کہا کہ  چھوٹے غالب سے  کہیں کہ غالب کا  کلام سنائے۔  آپا جی مجھے حکم فرمایا  تو  میں نے  جھٹ سے شعر عرض کیا:۔

کھلتا کسی  پہ  کیوں میرے دل کا معاملہ

شعروں  کے انتخاب نے رسوا کیا مجھے

اثیر احمد  خان صاحب  نے دوبارہ پڑھنے کو  کہا تو میں نے وضاحت کی کہ  موجودہ  سیاسی  حالات کے پیشِ نظر  دوسرے  مصرع کو   یوں  بھی پڑھا  جا سکتا ہے کہ :۔

"شیروں" کے انتخاب نے  رسوا کیا مجھے

اثیر صاحب کو حیرانی ہوئی  کہ یہ شعر  غالب کا ہے  ، تو جواباً میں تصدیقی سرٹیفیکیٹ  دے دیا ۔

محترمہ  عشرت صاحبہ  اور ان کی دوست سمیر ا صاحبہ  رخصت ہونے لگیں  تو  افی صاحب انہیں باہر تک چھوڑنے گئے ، اور  مجھ سے ایک نوجوان نے نمبر مانگا  اور ساتھ ہی اپنا تعارف بھی کروایا  کہ  :۔" مجھے امجد  نواز کہتے ہیں، اور  میں بانو  آپا  جی کا منہ بولا بیٹا ہوں"۔ ہم  دونوں  مزید  گپ شپ کیلئے  باہر پورچ میں آ گئے اور   پھر گپوں  کی  پٹاریاں  کھل  گئیں ، یہاں تک کہ افی صاحب  واپس  آئے اور  مجھے ساتھ لیتے ہوئے  اندر چلے گئے۔   اندر  اثیر  احمد خان  صاحب  ارسل مبشر کا  انٹرویو  لے رہے تھے ۔ میں اندر گیا تو میرا بھی انٹرویو  شروع ہو گیا۔  مجھ سے  میری کوالیفیکیشن  پوچھی ۔ بتانے پر   ان کے چہرے پر کچھ ایسے تاثرات ابھرے  جیسے سوچ رہے ہوں  کہ:۔"حلیے سے اتنے پڑھے لکھے لگتے تو نہیں ہو۔"کچھ دیر  کے انٹرویو  کے بعد  انہوں نے  ہمیں رخصت ہونے کی اجازت  دے دی،  اور ہم  الٹے قدموں  چلتے دروازے  سے  باہر نکل آئے ۔ جوتے پہنے اور  شاداں و فرحاں  داستان  سرائے  کے گیٹ سے باہر  آ گئے ۔   

 داستاں  سرائے  کی نیم پلیٹ پر چمکتے الفاظ  کے ساتھ  افی صاحب  نے ایک  میری  اور ارسل  مبشر کی تصویر لی اور دو تین چھلانگوں  میں ہم سڑک کے پار کھڑی افی صاحب کی  کار کے پاس  جا پہنچے ۔  ارسل نے  پچھلی  سیٹ پر قبضہ  جما لیا اور  میں آگے  افی صاحب  کے ساتھ  بیٹھ  گیا۔  افی صاحب  نے گاڑی سٹارٹ  کی اور  ہم وہاں سے چل پڑے۔

مکمل تحریر >>>

چلتے ہو تو لاہور کو چلیے (قسط نہم)۔

اور بات  آئی گئی ہو گئی ، کھانے کیلئے اٹھنے لگے  تو  افی صاحب کی آواز آئی  :۔ "اماں جی! یہ دو فنکار  آئے بیٹھے  ہیں ۔ ان سے ابھی  کچھ سنا جائے  یا کھانے کے بعد۔ ؟ اور  کچھ دیر کے تردد کے بعد  پہلے ان کو موقع دینے کا فیصلہ ہو گیا۔  

اتنی دیر سے میں بھی کمرے میں  موجود تھا اور وہ میاں بیوی  بھی موجود تھے، مگر  واللہ  باللہ  ان کے گانا شروع کرنے سے پہلے  مجھے ان کی موجودگی کا احساس تک نہ ہوا  تھا۔  افی صاحب  نے  ان   سے پوچھا  کہ  ایسے  ہی زبانی کلامی  سنائیں گے یا بجانے کیلئے  تھال بھی  حاضر کیا جائے ۔اس  نے  "مومن  ہے تو بے تیغ بھی   لڑتا ہے سپاہی " قسم کا  جواب دے کر  یہ بھی کہا کہ اگر تھال مل جائے تو سونے پہ سہاگہ والی بات ہو گی ۔تھال حاضر کیا گیا۔  اور انہوں نے اپنے  فن کا مظاہرہ کیا کیا، بس یوں سمجھیں  کے  ماحول پہ  فسوں پھونک دیا۔  میں  نے زندگی میں پہلی بار   ایک تھال  اس قدر مسحور کن دھن میں بجتے ہوئے  سنا تھا۔ صرف میں ہی  کیا سب کا یہی خیال  ہوگا یقیناً ۔ تبھی تو ہر کوئی اپنے موبائلز  اور آئی فونز  سے ان کی ویڈیو بناتا نظر آیا ۔اختتام  پر بھرپور  تالیوں  سے انہیں داد  دی گئی۔

اچانک  مجھے  احساس  ہوا  کہ  میری بغل میں کھڑا  کلین  شیو  بندہ  میری طرف کنکھیوں سے دیکھ رہا ہے ۔  میں ذرا سائیڈ  پہ ہوا تو  وہ سرک کے پھر قریب   ہوا اور  کندھے سے کندھا ملا کر کھڑا ہو گیا۔  میں ابھی اس کی طرف دیکھنے ہی والا  تھا کہ  وہ آگے بڑھا  اور  افی صاحب  سے جھک کر ملتے ہوئے بولا:۔ "سر آپ  ڈراموں میں آتے ہیں  ناں۔" افی صاحب کے چہرے پر  شرارتی سی  مسکراہٹ دوڑ گئی۔ اور انہوں نے  میری طرف دیکھا ، میں کچھ نہ سمجھنے والے  انداز  میں   ہونق کھڑا تھا یہاں  تک کہ  وہی  کلین شیو  بندہ سیدھا  ہو کے میری  طرف مڑا  اور میرے گلے لگ گیا۔ 

یہ حضرت کوئی  اور نہیں، ارسل مبشر صاحب تھے۔

خلاف معمول  شلوار قمیض  اور کیمل کلر  کے  کوٹ میں ملبوس ،  ارسل  تصویروں  سے کہیں زیادہ اصل میں شاندار نظر آ رہا تھا۔  اور یہ بات میں نے اس سے کہہ بھی دی (جس پر بعد میں  کئی بار پچھتایا)کہ  تصویروں سے  زیادہ  اچھی پرسنالٹی تمہاری اصل میں ہے۔ اور  اس پر اسے ایک شعر بھی سنایا

تجھ میں جو بات ہے، وہ بات نہیں آئی ہے

کیا یہ تصویر  کسی غیر سے کھنچوائی ہے؟؟

ابھی اس بات پر  ارسل  ٹھیک سے پھول  بھی  نہ پایا تھا  کہ افی صاحب نے  ہمیں  ڈائننگ ہال میں دھکیلا کہ  پہلے کھانا کھا لو،   باتیں تو تمہاری ایک  بار شروع ہوئیں  پھر ختم نہیں ہونیں ۔ اور ہم  ڈائننگ ہال میں آ گئے۔ زبردست چپاتیاں  اور  مرغی کا گوشت  تھا۔  سویٹ ڈش میں حلوہ تھا۔باقی سب مہمان بھی شرماتے  لجاتے  وہیں جمع  ہو گئے ۔ کیونکہ  بانو آپا کی سخت تاکید تھی کہ کوئی بھی مہمان کھانا کھائے  بغیر  نہیں جائے ۔ ارسل  نے تو  مجھے  کہہ دیا کہ  میں کھانا کھا کرفیصل آباد  سے   نکلا تھا، لیکن   میں  بھلا کیسے داستان سرائے  کی مہمانی  ہاتھ سے جانے دیتا۔  البتہ  کھڑے ہو کر  ایک ہاتھ میں روٹی اور ایک  ہاتھ میں سالن  کی پلیٹ لے کر کھانے سے مجھے الجھن ہو رہی تھی۔افی صاحب تو  بھنبھیری  بنے ہوئے کبھی ادھر آ رہے تھے کبھی ادھر جا رہے تھے ۔ میں  نے کہا  :۔"ہمیں تو بیٹھنے کی  کوئی مناسب جگہ دکھا دیں ۔" افی صاحب بھلا کب چوکتے، بڑے معصومانہ انداز میں دریافت کیا:۔ "کیوں ؟  کی کتیاں طرح  کھانی اے ؟" حلق سے ابلتے قہقہے کو کہا کہ زمزم، اور افی صاحب سے کہا :۔ "جی نہیں ، بلکہ انسانوں  کی طرح بیٹھ کے کھانی ہے ۔" وہ کوئی جواب دئیے بغیر  پھر غائب  ہو گئے ۔ آخر میں نے دو روٹیاں اور ارسل نے سالن نکالا  اور ہم  اپنی مدد آپ کے تحت  جگہ  تلاش کرتے لاؤنج میں گھس گئے۔ وہاں بیٹھ کے اطمینان  سے کھاتے رہے  اور  گپیں بھی ہانکتے رہے ۔ارسل  بھی میرا ساتھ دینے  کے بہانے  کھاتا  رہا۔  مگر  ڈائننگ  ہال میں کھانا  کھاتی  دو تین خوبصورت  حسیناؤں  کی  موجود گی  ارسل کو بے چین کیے رہی۔ اسے شاید میرے ساتھ ادھر بیٹھ  کے  کھانے کے  فیصلے پر  پچھتاوا ہو رہا تھا  جس کی پاداش میں وہ  دیدارِ حسن سے اتنی دیر تک ناحق محروم  رہا۔ تھوڑی تھوڑی  دیر بعد مجھ سے پوچھتا :۔" یار چھوٹے!! حلوہ بڑا زبردست ہے، تمہارے لیے لے آؤں؟" میں نے ٹال دیا:۔ "دیکھنے میں تو واقعی زبردست لگ رہا تھا  مگر تمہاری بدقسمتی  کہ میں حلوہ کھاتا ہی نہیں۔"اور ارسل کا دیکھنے والا منہ بن گیا۔ کچھ دیر  بعد پھر  مجھے سالن اور لانے کی آفر کی، مگر میں نے انکار کر دیا۔  پھر روٹی اور لانے سے انکار کے بعد  آخر کار  پانی لانے کی آفر پر  مجھے ترس آگیا۔  حالانکہ کھانے کے دوران یا کھانے کے فوراً بعد میں پانی بھی نہیں پیتا۔پھر بھی ارسل  کو  ڈائننگ ہال جانے کا ایک بہانہ فراہم کرنے کیلئے  میں  نے پانی کے  گلاس  پر حامی بھر لی۔  کہ بقول ناصر کاظمی

وہ "ٹھرکی" سہی ، پھر بھی یار اپنا ہے

 ارسل  تیر  کی طرح  ڈائننگ ہال میں گیا اور شاید چار پانچ گلاس پانی پی  کر ایک گلاس میرے لیے  لے کر  کافی دیر بعد  واپس آیا۔ ہمارے  کھانا کھانے  کے منظر کو بھی افی صاحب نے کیمرے میں  قید کر لیا۔  کھانے کے بعد  ہم دونوں کو اشفاق  صاحب کے کمرے کی راہ دکھائی گئی۔  یہ وہ سیڑھیاں  ہیں جہاں سے  اشفاق صاحب اوپر اپنے کمرے میں جاتے تھے۔  اور یہ  وہ  کمرہ  ہے  جس میں قدرت اللہ  شہاب صاحب  کا قیام رہا کرتا تھا۔  اس کے بعد  وہ جگہ دیکھی  جہاں  اردو  ادب کے  درخشندہ  ستارے  یعنی  جناب  ممتاز مفتی  صاحب ، ابن انشا ء  صاحب  ، قدرت اللہ  شہاب صاحب  اور اشفاق احمد  صاحب   محفل جمتی تھی۔اس  وقت  بے طرح غالب کی یاد  آئی کہ کس عالم  میں اس  عارف  نے  کہا ہوگا:۔

مقدور ہو تو خاک سے پوچھوں کہ اے لئیم

تو نے وہ گنج ہائے گرانمایہ کیا کیے؟؟

ہم جب  داستان سرائے  کے تاریخی گوشوں  کی سیر کے بعد  واپس   چوپال میں پہنچے  تو  بانو آپا  کے پاس   رش لگا ہوا دیکھا۔  سب ان کے ساتھ تصویریں  بنوانے اور ان سے آٹو گراف  لینے  میں  مصروف تھے۔  بانو آپا سب سے فرداً فرداً پوچھ رہی تھیں کہ کھانا اچھے سے کھایاہے ناں؟اور  اسی  مسکراتے  صبیح چہرے  اور خندہ پیشانی  سے  سب کو آٹو گراف دیتی رہیں ۔جبکہ میں نے اس دوران   اشفاق احمد  صاحب  کے بتائے  ہوئے طریقےسے   ایک  کونے میں بیٹھا  بابا ڈھونڈ لیا۔ وہ  فنکار  بابا  ایک طرف اداس بلبل  کی طرح سکڑا سمٹا  بیٹھا تھا کہ میں نے جا لیا۔  استاد ِمحترم خان بہادر  مرزا اسد اللہ  بیگ غالب کا  بھی یہی شیوہ تھاکہ  جب کوئی شعر  پسند آتا تو  چاہے وہ کسی کا  بھی ہو اس قدر تعریف کرتے  کہ مبالغے  کی حد کو پہنچا  دیتے۔ اس کے علاوہ   بھی لوگوں  کی حوصلہ افزائی  کرنا  وہ  جیسے فرض سمجھتے تھے۔  تذکرہ غوثیہ  میں غوث علی  قلندرؒ صاحب  نے ان کا جو آنکھوں دیکھا  واقعہ نقل کیا ہے ، وہ میرے جیسے دیوانگانِ غالب  کیلئے  مشعلِ راہ ہے۔

میں نے بابے کی  تعریف کی تو  اس نے  رسمی سی تعریف سمجھ کر  وہی  کہا جو  عموماً ایسی  باتوں کے جواب میں کہا جاتا ہے۔  مگر میں تو جیسے لسوڑا  ہو گیا۔  کچھ دیر تو اسے یقین نہ آیا  کہ  ایک پینڈو  سے نوجوان کو  بھی موسیقی  کی ایسی سمجھ ہو سکتی ہے ۔ میں گھِستا  رہا گھِستا رہا  یہاں تک  کہ بابا کھلنے لگا۔  اور پھر ہم دونوں  کے  درمیان جو بے تکلفانہ  گفتگو شروع ہوئی  تو  اس چند منٹ کی گفتگو میں ، خاکسار نے اس سے اتناکچھ  سیکھ لیا  کہ جتنا ادھر بیٹھے سوٹڈ بوٹڈ "کہنہ مشق استاد" ساری  زندگی  بھی  نہ سیکھ  پائیں۔ کیونکہ  وہ  اپنی وضع داری  اور     رکھ رکھاؤ  کی  بیڑیوں  میں جکڑے  تکبر  کی جس  جیل  کے قیدی ہیں ،وہاں  سے ایسی انمول پوربی  ہوائیں نہیں گزرتیں ۔  یہ ہوائیں تو زمین  پہ اگے چھوٹے  چھوٹےپودوں کے  پھول کھلاتی ہیں۔ 

الحمد اللہ  جوگی  تو ویسے بھی خاک نشین  ہے اور  استادِ محترم  کا  بھی یہی نعرہ تھا 

رواج صومعہ ، ہستی ست ، زینہار مرو

متاع میکدہ  مستی ست ، ہوشیار بیا

حصار عافیتے  گر ہوس کنی  غالب

چو ما بہ  حلقہ رندانِ خاکسار  بیا

(اس کے اردو ترجمے کی بجائے بہتر ہے  کہ صوفی غلام مصطفیٰ تبسم  جو کہ اشفاق احمد صاحب کے اساتذہ میں سے ہیں ، کے قلم سے کیا گیا  لازوال  ترجمہ  درج کر دوں  تاکہ فارسی سے نابلد قارئین  بھی اس سے کماحقہ  لطف اندوز ہو سکیں)

اے رواج اے مسجداں مندراں دا، اوتھے ہستیاں  تے خود پرستیاں نیں

مے خانے وچ مستیاں ای مستیاں نیں  ، ہوش کر بن کے ہوشیار آجا

سکھی وسنا جے توں چاہنا ایں ، میرے  غالبا! ایس  جہاں اندر

آجا  رنداں دی بزم وچ بہہ جا ،  ایتھے بیٹھدے نیں خاکسار آجا

اتنے میں مجھے قدوسی  صاحب  بلانے  آ گئے ،  تو میں  نے بابے کی جان چھوڑی  اور ادھر  ڈرائنگ روم میں آ گیا۔  کمرہ چند خاص  مہمانوں کے علاوہ  خالی ہو چکا تھا ۔ ارسل مبشر آگے بڑھا  اور آپا جی کی  قدم بوسی کی۔ اور ان سے  حال چال پوچھنے لگا۔  اور میں نے  پھریہ موقع  غنیمت جانا  اوراس  فرصت  کو  تصورِ جاناں  میں ضائع کرنے کی بجائے  قدوسی صاحب  پر غور کرنا شروع کر دیا۔  

پہلی نظر میں  دیکھتے ہی ایسے لگتا ہے  جیسے آپ کے سامنے اشفاق احمد صاحب  آ گئے ہوں ، کافی حد تک  ان جیسے لگتے ہیں۔  چھوٹی چھوٹی سفید داڑھی بھی بالکل اشفاق احمد صاحب جیسی ہے ۔ جی میں آیاان سے کہوں  کہ قدوسی صاحب!!آپ تو ابھی زندہ ہیں جبکہ ٹی وی پر  آپ کی  بیوہ کے  نام سے ڈرامہ آتا  ہے۔    پھر اس  خیال پر  دل میں ہنس کر میرؔ کی  طرح خود  کو تنبیہہ کی کہ  "پگڑی  سنبھالیے میرؔ ،یہ دلی ہے"افی صاحب نے بتایا  کہ یہ تقریباً چالیس سال سے  اشفاق  احمد صاحب اور داستان سرائے کی خدمت میں ہیں۔  مجھے بہت  رشک آیا۔ جن کو اتنا عرصہ  اشفاق احمد صاحب  کی  صحبت نصیب ہوئی تو  ظاہر ہے ان کے  تو ہر  انداز سے  بابا جی کے افکار  ظاہر ہونے ہی  ہیں ،  بے  حد  سادہ  اور سیدھے  سبھاؤ  کے  متین بزرگ  ہیں۔

مجھے پھر شیخ سعدی  یاد آ گئے 

گلے خوشبوئے در حمام روزے

رسید از دستِ محبوبے بدستم

بدو گفتم کہ مشکے یا عبیرے

کہ از بوئے دلآویز تو مستم

بگفتا من گلے نا چیز بودم

و لیکن مدتے با گل نشستم

جمالِ ہمنشیں بر من اثر کرد

وگرنہ اینہمہ خاکم کہ ہستم

ترجمہ:۔  ایک روز حمام میں نہاتے ہوئے  ، ایک عزیز دوست کے ہاتھ سے مجھ تک خوشبودار مٹی پہنچی۔ میں نے کہا : تو مشک ہے یا عبیر ہے؟ کہ تیری دلآویز خوشبو سے میں مست ہوا جا رہا ہوں۔وہ بولی : میں تو ناچیز مٹی تھی، لیکن ایک مدت تک پھول کے ساتھ  صحبت رہی۔  ہمنشیں کے حسن کا مجھ پر اثر ہواہے ورنہ  میں تو وہی خاک ہوں ۔

  میں ان سے متاثر ہوئے بغیر نہ رہ سکا۔اور یہی وجہ ہے  کہ واپسی  پر  میں نے  قدوسی  صاحب سے بھی اپنے ساتھ ایک عدد تصویر  کی درخواست  کی،  جس  پر انہوں  نے حیرانی سے مجھے دیکھا اور پوچھا کہ "میرے ساتھ کس لیے" میں نے کہا:۔ "مدتے با گُل  نشستی و از  بوئے  دلآویز  ِ تو  مستم" اس کے جواب  میں انہوں  نے ایک دلآویز  تبسم  سے نوازا  اور ارسل اور  میرے درمیان کھڑے  ہو گئے اور افی صاحب  نے  اس لمحے  کو تصویر  کی صورت  محفوظ  کر لیا۔   قدوسی  صاحب  نے  مجھ سے نام اور فون نمبرپوچھا تاکہ  وٹس ایپ پر  پوسٹ کرنے  کیلئے  تصویر  کو کیپشن دے سکیں۔ 

مکمل تحریر >>>

چلتے ہو تو لاہور کو چلیے (قسط ہشتم)۔

بانو آپا   کے گرد پہلا حلقہ  خواتین  کا تھا، جن میں بانو  آپا کے دائیں طرف  سرخ شال میں لپٹی  معروف ڈریس ڈیزائنرمحترمہ عشرت  صاحبہ  زلفِ سیاہ (اپنے ہی )شانوں  پہ  پریشاں کیے ہوئے  بیٹھی تھیں، محاورتاً نہیں حقیقتاً  کالی ناگن جیسی یہ زلفیں دیکھ کر  مجھے اپنے  ماضی قریب کے  گھور سیاہ  بال یاد آگئے  جن میں اب بزرگی کی  سفید لہریں  دوڑتی  پھرتی ہیں۔عشرت صاحبہ  کی دوست  سمیرا صاحبہ کے علاوہ   پنجاب یونیورسٹی  شعبہ اردو  کی چند طالبات چہرہ  فروغ غازے سے گلستان کیے ہوئے  بیٹھی تھیں۔  دعاتو بڑے غالب  نے  کی تھی ، لیکن دیوانی مقدمے  کی طرح اس دعا کی قبولیت  کا فیصلہ آنے تک  بڑے غالب اس دنیا سے جا اور چھوٹا غالب  آ چکا تھا۔ پس استاد ِ محترم کی یہ

چاہے ہے  پھر کسی کو مقابل  میں آرزو 

 سرمہ سے  تیز  دشنہ ء ِ مژگاں کیے ہوئے

والی  آرزو  جوگی کے جوگ کا متحان  بنی رہی۔ اور  

دوڑے ہے  پھر  ہر ایک گل و لالہ پر خیال

صد گلستاں  نگاہ کا ساماں کیے ہوئے

والا معاملہ  درپیش رہا۔  اگر پہلوان لنگوٹ کے پکے ہونے پر  فخر کرتے ہیں تو جوگی  بھی جوگ کا  پکا نکلا، یا شاید بزمِ بانو آپا  کے آداب  مانعِ  رہے۔  بہرحال جو کچھ بھی ہو، اب میں ڈنکے کی چوٹ پر کہہ سکتا ہوں  کہ 

اس بزم میں مجھے ، نہیں بنتی حیا کیے

بیٹھا رہا  ۔۔۔اگرچہ حملے  ہوا کیے

(شعر کو اس کی اصلی صورت میں یعنی "حملے " کی جگہ "اشارے"  بھی پڑھا جا سکتا ہے ،  لیکن  لفظ"حملے" صورتِ حال کی  خوب وضاحت کرتا ہے)

 اور ان کے  بعد  مردانہ  حلقہ تھا ، جس میں  طلباء  سمیت  چند ادیب حضرات  (جن سے میں تا وقت ِ برخاستن ناواقف ہی رہا) شامل تھے۔ افی صاحب  نے اسی دوران اپنی جگہ  پہ  بیٹھے  بیٹھے میری تصویریں بنا لیں۔

سوالات  کا سلسلہ  چل رہا تھا ،اور  نہایت ہی بچگانہ اورخواہ مخواہ  قسم کے سوالات  پوچھے جا رہے تھے ۔   ایک دو صاحبان  تو سوال پوچھنے کے بہانے دراصل اپنی علمیت جھاڑنے  میں مصروف تھے۔  اس کے علاوہ  اشفاق احمد صاحب  اور بانو آپا جی  کی کتب میں لکھی ہوئی باتوں کو دوبارہ  سوالیہ انداز میں پوچھا جا رہا تھا ۔ایسا لگا  جیسے  سوال پوچھنے والے  دراصل بانو آپا کی یاداشت کا امتحان لینے آئے بیٹھے ہیں کہ آپا  جی نے  فلاں کتاب میں جو یہ بات لکھی ہے تو  کیا   اس عمر میں بھی ان کو وہ بات یاد ہے یا نہیں۔ جیسا کہ  ایک  صاحبہ  نے  پوچھا کہ  بعض گداگر   جو کہ مستحق  بھی نہیں لگتے ، بلکہ ہٹے کٹے بھی ہوتے ہیں ، کیا انہیں خیرات دینی چاہیے۔؟ اور مجھے اچھی طرح یاد ہے  اس  کا تسلی بخش  اور شافی جواب  اشفاق احمد  صاحب اپنے ایک مضمون "ہاتھ کا دیا" میں دے چکے ہیں۔  جس میں  انہوں نے اپنے بابا جی کا  ایک جملہ "دتے وچوں  دتا  ای ناں" کے حوالے سے  اس بات کی  بہت زبردست وضاحت  فرمائی  ہے۔  مجھے یقین ہے کہ ان محترمہ  نے "زاویہ"  میں سے پڑھ کے ہی  یہ سوال تیار کیا ہوگا کہ دیکھتے ہیں بانو آپا کا  اس  بارے میں کیا مؤقف ہے۔  اور بانو آپا  کا عین وہی جواب تھا جو اشفاق  احمد صاحب برسوں پہلے دے چکے ہیں۔

اس  کے علاوہ  بار بار گھما پھرا  کے الفاظ کے معمولی ہیر پھیر کے  ساتھ ایک ہی سوال  ہو رہا تھا  کہ "آپا جی محبت کیا ہے؟" دوسرا پوچھتا"آپا جی عشق کیا  ہے؟" اب تیسرا  پوچھتا"عشق کی انتہا کیا ہے" اب چوتھا پوچھتا کہ" محبت اور عشق میں  فرق کیا ہے؟" جیسے  لوہارچھری  یا  کلہاڑی  کی دھارکو  پتھر  کی سل پہ بار بار  گِھسا گِھسا کراس کے دھار تیز  کررہے ہوتے ہیں ، بالکل اسی طرح حاضرین  بھی شایدعشق و محبت  کی  تلوارکی  دھار تیزکرنے  کے درپے تھے۔

آپا جی  کے  صبر و تحمل اور اعلیٰ ظرفی  کے صدقے  جاؤں  ، جن کے ماتھے پہ نہ تو کوئی شکن پڑی، نہ انہوں نے کسی سوال کا جواب اکتائے ہوئے انداز میں دیا، نہ ہی  کسی کو یہ جتایا کہ  بیٹا  یہ سوال تو تمہارے  سامنے  کئی بار  پوچھا اور  جوابا جا چکا ہے ، پھر بھی اسی کو پوچھنے کا کیا مطلب ہے۔؟

ان فضول سوالوں  سے قطع نظر آپا جی نے ایک بہت ہی زبردست  بات بیان فرمائی ۔"  زندہ رہنا چاہتے ہیں تو محبت کریں۔ جب بھی کریں  محبت کریں ، عشق نہ کریں۔  کیونکہ محبت  زندہ  رکھتی ہے ۔ عشق جلا دیتا ہے۔"

میرے جی میں  آیا کہ میں بھی ایک  سوال پوچھوں ۔ مگر کیا پوچھوں ؟یہ معلوم نہیں تھا۔  جب آپا جی کی  باتوں کا  رخ   انسان اور انسانیت  کی  جانب مڑا  تو  میرے دماغ میں فوراً سوال  آیا اور میں نے کھڑے ہو کر  سوال پوچھ بھی لیا۔ 

اس وقت سب لوگ اپنی اپنی جگہ بیٹھےبیٹھے ہی سوال پوچھ رہے تھے ۔  جبکہ میں نے کھڑۓے ہو کر سوال  پوچھا  ،  تو  کچھ لوگوں نے  مجھے  استہزائیہ  انداز میں دیکھا جیسے آنکھوں ہی آنکھوں میں کہہ رہے ہوں"پینڈو  ، پینڈو ہی رہتے ہیں" کوئی اور فورم ہوتا یا محفل ہوتی تو  کھڑی ہوتی تھی میری بلا۔۔۔۔  اگر ہم کلاس میں ایک عام سے ٹیچر کے  سامنے کھڑے ہو کر  سوال  اور جواب پوچھ سکتے ہیں  تو  کیا بانو آپا  جیسی عظیم ہستی کے احترام  کھڑے ہونے سے گوڈے گٹے گھِس  جاتے۔ 

میرا سوال  تھا  کہ " غالب  فرماتے ہیں:۔ آدمی کو بھی میسر  نہیں انساں ہونا۔  آپ کے خیال  میں انسان اور آدمی میں کیا فرق ہو سکتا ہے ، جو غالب نے انسان اور آدمی  میں ایک حدِ فاصل قائم کر دی ہے۔؟"

اور جواب  میں بانو  آپا نے چند لفظوں میں یہ گتھی  سلجھا کے مجھے سر دھننے  پہ مجبور کر دیا۔  آپ نے فرمایا :۔ " بیٹا!! انسان وہ ہے  جو اللہ کی مانتا ہے ۔ آدمی وہ ہے  جو اللہ کی بجائے اپنی  مانتا ہے۔"

 اس دوران  اشفاق  احمد  صاحب کے صاحبزادے  اثیر  احمد خان  اندر تشریف لے آئے ۔ آپ  اشفاق احمد صاحب  کے  ہمشکل بھی ہیں۔ یوں لگا جیسے  اشفاق صاحب کو جوانی میں  دیکھ رہا ہوں۔  افی صاحب نے ان سے میرا تعارف کروایا  اور انہوں نے  مجھ سے مصافحہ کیا ۔ پھر میرے ساتھ ہی بیٹھ گئے ۔  کچھ دیر  بعد مجھے محسوس  ہوا کہ"شور برپا ہے "میری  جیکٹ کی جیب میں ۔ جیب میں ہاتھ ڈالا  تو پتا  چلا کہ "گھنٹی بج رہی  ہے ابھی"۔ محفل سے اٹھ کے  ڈائننگ  روم میں چلا گیا  اور  کال اٹنڈ  کی۔ پتا چلا کہ میرے  داستان  سرائے آنے کی خبر  ملتان تک  بھی پہنچ چکی ہے ۔ ان سے جان چھڑائی کہ  آپ کو واپسی پر  ساری روداد سنا دوں گا۔اور یہ موبائل بھی  بند کر کے جیب میں ڈال  لیا ، مبادا  کوئی اور مخل ہو۔ 

تھوڑی  دیر بعد میں نے افی صاحب کوبھی موبائل  کان سے لگائے باہر نکلتے دیکھا۔ لیکن اس وقت چونکہ  میری توجہ بانو آپا کی طرف تھی  اس  لیے  زیادہ غور نہ کیا۔  اور ایک سوال  جس کو بہت چچوڑ  چچوڑ کےبار بار  الفاظ کے ہیر پھیر کے ساتھ  پوچھا جا رہا تھا "صبر کیا ہے؟"

آپا جی نے  نہایت  تسلی بخش  اور سادہ سا جواب دیا:۔ " اللہ کی رضا پہ دل سے راضی ہو جانا صبر ہے۔" اس جواب میں نہ کوئی ابہام ہے نہ  کوئی  پیچیدگی، لیکن  پھر بھی نہ جانے  کیوں  پطرس کے  مشہورِ زمانہ مضمون "کتے" کے ایک  منظر "اب جناب ایک کہنہ مشق استاد کو جو غصہ آیا، ایک حلوائی کے چولہے میں سے باہر لپکے اور بھنا کے پوری غزل مقطع تک کہہ گئے۔  " کی  طرح  کچھ صاحبان  کے اندرونی چولہے   سےکچھ کہنہ مشق۔۔۔۔۔ برآمد ہوئے  اور  آپا  جی کے  جواب میں نیبو نچوڑ  کے  عالمانہ  جواب  گھڑنے لگے۔ 

جب دو تین  "کہنہ مشق استاد" صبر کا  بیان کر چکے  تو  ایک  اور صاحب  جوشاید  سب کے تھکنے کے انتظار میں بیٹھے تھے ، گویا ہوئے "آپا جی!! ابھی کچھ ہی عرصہ پہلے میری  والدہ محترمہ کی وفات ہوئی۔ میرے والد صاحب کو تو  میں  نے نہیں دیکھا کیونکہ  میرے ہوش سنبھالنے سے پہلے  ہی وہ وفات پا چکے تھے، اس لیے آپ سمجھ سکتی ہیں  کہ  میں والدہ  سے کتنا قریب تھا۔ میرے لیے دنیا میں بس وہی ایک سہارا تھیں۔   ان کی وفات پر  آنے والےسب رشتے دار اور میرے دوست احباب مجھے ایک ہی بات کہہ رہے تھے  کہ "صبر کرو۔" ، "صبر سے کام لو۔" وغیرہ  وغیرہ ۔۔۔ سب صبر کرنے کا تو کہہ رہے تھے مگر مجھے یہ کوئی یہ نہیں سمجھا رہا تھا کہ صبر ہے کیا؟ اور میں کیسے صبر کروں۔؟"

اندازہ فرمائیے !

آپا جی اس سے پہلے ہی جواب دے  چکی ہیں کہ"اللہ کی رضا پہ  دل سے راضی ہو جانا  صبر ہے" اس کے بعد  بھی ایسا سوال  آجائے ۔ وہ بھی ایک اچھی خاصی عمر کے  بظاہر مہذب اور سوٹڈ بوٹڈ  معقول نظر آنے  والے  ایک  صاحب کی طرف سے ۔۔۔

حیراں  ہوں  گال  کو پیٹوں  کہ  کُوٹوں  سر کو میں

اس پرایک بار پھر  صبر پر بھانت بھانت کی وضاحتیں آنے لگیں ، اور مجھے    گلستان سعدی  کی وہ حکایت  یاد آ گئی ۔ جس میں  ایک گمنام   درویش مسافر  ،قاضی کی مجلس میں آیا جہاں  کسی مسئلے پر  بحث ہو رہی تھی  اور علما ء کرام علم کے دریا بہا،   زمین پہ مکے برسااور  منہ سے جھاگ اڑا رہے تھے  لیکن مسئلہ  تھا  کہ کسی طور بھی حل ہوتا نظر نہیں آ رہا تھا۔

اس وقت  بھی  میرے سامنے  قریب قریب ویسی ہی صورت حال تھی ۔  آپا جی  کا  ادب  مانع تھا  ورنہ  کچھ بعید  نہ تھا  کہ زمین پہ مکے برسنے  اور  منہ سے جھاگ اڑنے والی کسر بھی باقی   نہ رہ گئی   ہوتی۔اس  بار  بھی جب  سب بولنے والے بول چکے تھے  تو  سائل  صاحب خود ہی   بڑے عالمانہ انداز میں آپا جی سے مخاطب ہوئے:۔"آپا جی !! جہاں تک میں سمجھا  ہوں  ۔ صبر یہ ہے کہ  بدلہ  لینے کی طاقت  رکھتے ہوئے بھی  معاف کر دینا صبر ہے ۔"توکئی طرف سے  صبر کی اس  تعریف  کے حق میں   تائیدی بیان  داغے  گئے۔  یہ تعریف  جزوی طور  پر  تو  ٹھیک کہی  جا سکتی  ہے مگر   اسے صبر  کی  یونیورسل  تعریف ہر گز نہیں کہا جا سکتا ۔ اور آپا  جی والی صبر کی تعریف سے  تو اس بچگانہ  تعریف  کا  موازنہ قطعاً مناسب نہیں۔ لیکن جو تائیدی  بیان اس کے حق میں  آ رہے تھے اُنہیں سن کر  تو ناطقہ سر بگریباں  تھا کہ اِنہیں  کیا کہیے۔؟

آخر کار  میں نے  بھی میدان میں کود کر  ان صاحب کو  دھوبی پٹڑے  مارنے   کا  ارادہ کیا  اور ان سے مخاطب ہوا:۔ "معاف کیجئے سر!! آپ کی وضع کردہ  تعریف  میں نہ صرف ابہامیہ  سقم ہیں بلکہ اچھی خاصی کنفیوژن ہے۔" موصوف  نے اس تنقیدی  توپ  کے داغے جانے پر  چیں بجبیں ہو کر پہلو  بدلا  اور دوبارہ وہی بین بجانے ہی لگےتھے  کہ  میں نے ٹوک دیا:۔"سر ! آپ کی تعریف کے مطابق  مدعی  نے  مدعا علیہ  سے بدلہ لینے کی طاقت رکھنے کے باوجود مدعا علیہ  کو معاف کر دیا  تو  آپ  نے اس صبر کرنا کہا۔ اس صورت میں فریقین  انسان  ہیں یعنی مدعی بھی  اور مدعا علیہ بھی  ۔اس  لیے  آپ کی وضع کردہ تعریف سے گزارہ  ہو گیا۔  لیکن جو پس منظر آپ نے سنایا  یعنی اپنی والدہ کی وفات والا ۔ اس کی  روشنی میں آپ اپنی  وضع کردہ تعریف  کے مطابق کیسے صبر کریں گے یعنی کسے صبر کہیں گے؟؟

وہ میرا سوال سمجھے بغیربولے :۔  آپ غلط سمجھے، میں  موت کی بات نہیں کر رہا۔"

میں نے اگلی پٹخنی دی:۔  یہی تو میں پوچھ رہا ہوں کہ موت کو  تو  میں نے ایک مثال کے طور پر کہا، موت کے علاوہ کسی بھی ناگہانی  آفت  کی صورت میں آپ کسے صبر کہیں گے؟  کیونکہ  اس  صورت میں فریقین میں سے مدعی انسان اور مدعا علیہ قدرت ہوگی ۔اب آپ اس صورت  میں اس تعریف سے  کیسے کام چلائیں  گے ؟ 

اس وقت وہاں موجود  حاضرین میں  حلیے کے لحاظ سے یہ خاکسارنہ صرف اول درجے کا جاہل اور پینڈو  نظر آ رہا تھا ۔  بلکہ  کسی کو مجھ سے ایسی منطقی  پخ  کی امید  بھی نہیں تھی ۔ اس لیے  کچھ ثانیوں  کیلئے توحاضرین کو  میرے  حلیے اور میرے سوال  کی نامطابقتی  پر  حیرانی کے مارے  سکتہ سا رہا۔ 

ان صاحب کو  تو  اندازہ بھی نہیں تھا کہ  آگے میں انہیں کون کون سی  پٹخنیاں دینے والا ہوں، اس  لیے آئیں بائیں شائیں کرنے ہی لگے تھے  کہ  جناب اثیر  احمد خان  صاحب جو میرا سوال اور اعتراض اچھی طرح سمجھ چکے تھے ، ان صاحب کو  پیش آمدہ خفت سے  بچانے  یا کسی ممکنہ بدمزگی سے  بچنے کیلئے  بیچ میں   بولے  باقی سب  باتیں کھانے کے بعد  کریں گے۔  ابھی کھانا ٹھنڈا  ہو رہا ہے ۔  چل کے کھانا کھا لیتے ہیں۔  

(ان کی تعریف  کے مطابق  وہ اپنی  والدہ کی  وفات پر  صبر کیسے کرتے ؟ کیونکہ نہ تو  ان میں عزرائیل علیہ السلام  یا اللہ  تعالی  سے بدلہ لینے کی  طاقت تھی  ،  نہ ہی اتنی حیثیت  یا اوقات تھی  بلکہ ان ہی کی کیا کسی بھی انسان کی کیا اوقات  کہ وہ کہے کہ  میں نےاللہ تعالیٰ کو  فلاں آفت  آنے یا کسی عزیز کے  وفات پانے پر  نعوذ باللہ  معاف کیا۔۔

سب سے بہترین اور یونیورسل  تعریف  آپا  جی نے فرمائی تھی کہ "اللہ  تعالیٰ کی  رضا پہ دل سے راضی ہوجانا صبر ہے۔")

مکمل تحریر >>>

چلتے ہو تو لاہور کو چلیے (قسط ششم)۔

کافی دیر تک ہم بغکگیر رہے. افی صاحب نے ایک بار پھرمجھے لاہور میں خوش آمدید کہا، اور  مجھے لےکر اپنے گھر کی طرف چل پڑے۔ جو کہ سبزہ زار میں واقع ہے۔ وہاں سب سے پہلےافی صاحب کے والد گرامی قدرسے ملاقات ہوئی ، اور افی صاحب نے میرا اس قدر مبالغہ آمیز تعارف کروایا کہ مجھے شرمندگی ہونے لگی۔

افی صاحب مجھے بٹھا کے نماز پڑھنے اندر چلے گئے میں ان کے والد صاحب سے گپ شپ کرتا رہا۔  مجھے افی صاحب  پہ بہت رشک آیا۔ کیونکہ ان کے والد صاحب اپنے ہونہار صاحبزادے کا ذکر  نہایت توصیفی انداز  میں کرتے رہے۔ ایک ہم تھے کہ اپنے والد صاحب کو کسی غیرکے سامنے   اپنی تعریف میں رطب اللسان دیکھنے یا سننے کی  حسرت دل  میں لیے اتنی عمر گزار  دی ، یہاں تک  کہ ان کی وفات ہو گئی اور وہ حسرت دل میں داغ ہو کر رہ گئی۔

افی صاحب اس لحاظ سے بھی خوش قسمت واقع ہوئے ہیں کہ ان کے والدین ان سے خوش اور راضی ہیں۔ اس سے یہ اندازہ کرنا مشکل نہیں کہ  جس بندے سے اس کے والدین اس قدر خوش اور راضی ہوں یقیناً اس سے اللہ  تعالیٰ بھی خوش اور راضی ہی ہوگا۔ اوراس لحاظ سے فدوی خوش نصیب ہےکہ ایسے دوست رکھتا ہےجن سے اللہ تعالیٰ راضی ہے۔

اب ہم نے والد صاحب سے دعائیں اور رخصت لی اور مون مارکیٹ آ گئے۔ اس دوران افی صاحب نے مجھے اپنی ایک مدحیہ نظم کی ویڈیو دکھائی جو کہ انہوں نے بابا جی اشفاق احمد صاحب کی شان میں کہی تھی۔ بلا مبالغہ بہت ہی سادہ اور دلی جذبات کی عکاس بہترین نظم تھی۔ سن اور دیکھ کر مزہ آ گیا۔

مون مارکیٹ میں کار پارک کی اور اندر بنے پارک میں چلے گئے۔ جہاں افی صاحب نے مجھے اپنا مخصوص گوشہِ نشست دکھایا، اوروہیں رکنے کا کہہ کرایک طرف غائب ہو گئے۔ میں اس دوران  آس پاس کا جائزہ لیتا رہا۔ اس وقت جہاں میں کھڑا تھا اس کے  بالکل سامنے گجرریسٹورنٹ اوراس کی اوپری منزل پر نرگس بیوٹی پارلر تھا۔

اتنے میں افی صاحب تین کرسیاں اٹھائے آگئے۔ دو پہ ہم بیٹھ گئے اور تیسری پہ انہوں نے ہاتھ میں پکڑے سگریٹ اور بسکٹ کے پیکٹ دھر دئیے۔  اتنے میں چائےبھی آگئی۔ افی صاحب نے دو جملے چائے کی تعریف میں کہے اورساتھ ہی کہا کہ میں  آدھا کپ پیوں گا۔ چائے کی چسکی لی تو ماننا پڑا  کہ واقعی مزے دار ہے۔ اگر یہی چائے استادِ محترم مرزا غالب کو کوئی پلاتا توآج مے نوش  کی بجائے چائے نوش مشہور ہوتے۔ اور یہ شعر  بھی یوں ہوتا:۔

قرض کی پیتے تھے چے، اور  سمجھتے تھے کہ ہاں

رنگ لائے گی ہماری بھی ڈھابہ مستی ایک دن

 

چے نوشی اور بسکٹ خوری کے دوران ہماری   زبان بھی چلتی رہی۔ اس سے فارغ ہوئے تو افی صاحب نے  دھواں نوشی  شروع کر دی۔ یہاں  مجھے اپنی غالبانہ نسبت پر شکر گزار ہونے کی ایک اور وجہ میسر آئی اور میں نے اس پہ اللہ تعالیٰ کا لاکھ لاکھ شکر ادا کیا۔

ایک بچہ ہمارے پاس آیا اور افی صاحب سے مصافحہ کر کے پوچھا:۔ آپ ڈراموں میں آتے ہیں ناں۔؟ افی صاحب نے اقرار میں نہ صرف سر ہلایا  بلکہ زبان بھی ہلائی, اور بچے سے پوچھا آپ نے کونسے ڈرامے میں مجھے دیکھا ہے؟ بچے نے پُرجوش ہو کر دو تین ڈراموں کے نام بتائے اور کہا کہ "ان میں سے دعا والا آپ کا ڈرامہ مجھے بہت پسند ہے۔" افی صاحب نے اس کا شکریہ ادا کیااور ساتھ ہی میراتعارف بھی یہ کہہ کر کروایا کہ یہ بھی ڈراموں میں کام کرتا ہے۔ آپ نے اس کا ڈرامہ دیکھا ہے "مرزا غالب"؟ بچے نے نفی میں سر ہلادیا۔

میں اس دوران یہ سوچ رہا تھا کہ اگر میں صرف اویس قرنی ہوتا تو اس بچے کی طرح میں بھی بس افی صاحب سے مصافحہ کرنے اور زیادہ سے زیادہ دو منٹ بات کرنے کا موقع پاسکتا۔ مگر بھلا ہو میری نسبت کا جس نے مجھے اویس قرنی سے جونیئر غالب بنا دیا ہے۔ جیسے اس بچے کی افی صاحب سے پہلی بار بالمشافہ ملاقات ہوئی ہے ویسے ہی میری بھی پہلی ملاقات تھی۔  مگرفرق یہ تھاکہ وہ آیا, افی صاحب سے ہاتھ ملائے چند باتیں کیں اور ملاقات ختم..... لیکن جونیئر غالب کیلئے افی صاحب اپناڈرامہ لکھتے لکھتے اٹھے ، بس ٹرمینل پراستقبال کو آئے، گھر لے گئے ، بچوں سے ملوایا ، اب ساتھ لیے پھر رہے ہیں۔  میرے ہی  ایک دوست کے انتظار کی وجہ سے ایک گھنٹہ لیٹ ہو رہے ہیں۔ میری مدارات ہو رہی ہیں۔

یہ سب کیا ہے؟؟؟

عزت دینے والا بے شک اللہ تعالیٰ ہے مگر

یہ سب عزت اور  توجہ مجھے غالب کے توسط سے مل رہا ہے۔

اے اہلِ دل ، اے اہلِ نظر  ۔۔۔ دیکھو  !!!! اگر دیکھ سکتے ہو  تو

مجھے یہ سب کچھ غالب سے مل رہا ہے

  ابو ظہبی سے شانی کی کال آگئی اور وہ مجھ سے ناراض ہونے لگا کہ جب میں پاکستان میں تھا تو آپ کو لاہور آنے کا خیال کیوں نہیں آیا۔ اسے اس بات پہ بھی حیرانی تھی کہ شانی اور ارسل سے میری دوستی افی صاحب سے بھی زیادہ پرانی تھی، مگر آج تک میں ان کے کسی بلاوے میں نہیں آیا ، جبکہ  افی صاحب سے  ملنے "آواں گی ہوا بن  کے" گنگناتاہوا دوڑا چلا آیا۔ اس نے مجھے پیشگی خبردار کیا کہ جنوری کے اخیر میں  وہ اپنے بھائی کی شادی کیلئے پاکستان آرہا ہے ، اور میری بھی شادی میں شرکت ضروری ہے ، جس کیلئے چشم براہ افی صاحب اور متمنی شرکت شانی ہوگا۔ اور کسی ٹال مٹول کی  صورت میں اچھا نہیں ہوگا۔

 

مزید تھوڑی دیر انتظار کرنے کے بعد جب کہیں سے بھی ارسل کے آنے کے آثار نظر نہ آئے توارسل کوکال کرکے بتایا کہ اڈے سے رکشہ پکڑنا اور داستان سرائے آجانا، ہم وہیں جارہے ہیں۔ اب ہم  مون مارکیٹ سے نکلے، کار میں بیٹھے اور اقبال پارک کے قریب سے ہوتے ہوئے داستان سرائے کی جانب چل پڑے۔ راستہ بھرافی صاحب اپنی پیروڈیز سنا سناکرہنساتے رہے۔

اچانک میرے موبائل پر ایک انجان نمبر سے کال آگئی۔ میں ایسی پر اسرار کالزکو نظر انداز ہی کر دیتا ہوں، لیکن افی صاحب نے مجھے کال سننے کا مشورہ دیا۔ سننے پر پتاچلا کہ وہ کوئی اور نہیں جناب عبدالرزاق قادری صاحب ہیں۔ چھوٹتے ہی شکوہ کناں ہو گئے کہ میں کتنے دنوں سے کالز اور میسیج کر رہاہوں مگر آپ تودرخور اعتنا ہی نہیں سمجھتے۔ میں نے معذرت کی اور بتایا کہ اس وقت آپ کے شہر میں ہوں ، نیز داستاں سرائے جا رہا ہوں، واپسی پرآپ کو بتاؤں گا، اگر آپ ملنا چاہیں تو چشمِ ما روشن دلِ ما شاد۔

اس کے بعد افی صاحب دوبارہ وصی شاہ کے  کلام کی درگت بنانے لگے اور میرے حلق سے قہقہے پھوٹتے رہے۔

یہاں تک کہ ماڈل ٹاؤن پہنچ گئے ، ایک جگہ افی صاحب نے گاڑی روکی اور درود شریف پڑھنے لگے۔ میں اس کایا پلٹ پرحیران تو ہوا کہ یا الہی یہ ماجرا کیا ہے...؟؟ لیکن  اس سے پہلے کہ کچھ پوچھتا کہ میری نظر سڑک کے دوسری جانب  ایک گیٹ پر جگمگاتے "داستاں سرائے" کے الفاظ پر پڑی اورمیں دم بخود رہ گیا۔

(جاری ہے....)                    

مکمل تحریر >>>

محمد ﷺ کے غلاموں کا کفن میلا نہیں ہوتا

اپنے بزرگوں  کےمزار پر  دربار  بنانے اور مجاور  بن کے بیٹھنے  کی  ہمیں  اجازت نہیں،  الکھ نگری  میں جو ممتاز  مفتی صاحب نے اپنے پیر و مرشد  سائیں اللہ بخش صاحب  رحمتہ اللہ علیہ کے مزار  کا احوال  لکھا ہے  ، یہاں  بھی کچھ ایسا  ہی حال ہے۔ یہ ایک  نہایت عجیب و غریب  قصہ ہے  جس کے متاثرین  میں سے آخری نام خاکسار کا ہے ۔

 اس پس منظر سے واضح ہو گیا  کہ  اپنے والد صاحب کی قبر  پر  ہم دربار  کھڑی کر کے آمدنی کا ذریعہ  نہیں بنا سکتے ، مگر پکی  قبر اور زائرین کے بیٹھنے کیلئے چبوترہ  تو بنوا سکتے ہیں۔ 

پس  تین  محرم  الحرام کو اس کام کا آغاز کیا گیا۔   بڑے بھائی  کا ارادہ  ابا جان کے پہلو میں دفن ہو نے  کا ہے تو منصوبہ یہ تھا کہ لگے ہاتھوں  ان  کی   قبر بھی  تعمیر  کر لی جائے  اور ساتھ  ہی بنیادیں کھڑی کر کے  ایک سادہ  ساکمرہ بنا دیا جائے  ۔  ہمارے  دیرینہ  مستری  حاجی محمد  رمضان صاحب جنہوں  نے  ابا جان  کی قبر تعمیر کی  تھی ،  کی نگرانی  میں کھدائی کا کام شروع ہوا۔ جب  کھدائی کرتے مزدور  قبر کے قریب پہنچے  تو  نہ صرف انہیں  بلکہ  ارد گرد کھڑے  سب لوگوں  کے  ناک سے تازہ گلابوں  کی خوشبو ٹکرائی۔  ہر  ایک دوسرے کی  طرف حیرانی سے  دیکھتاہوا یہ پوچھنے لگا کہ کیا خوشبو تمہیں بھی آئی ہے  یا صرف مجھے آ رہی ہے۔

اس  مرحلے پرہم نے  حاجی صاحب سے  ایک بار پھر پوچھا  کہ  قبر کی  محراب کے اوپر  منوں  کے حساب سے مٹی کا بوجھ پڑا ہے  ، جبکہ  آپ پہلو سے مٹی ہٹوا کے کھدائی کروا رہے  ہیں، کیا اس سے واقعی  مٹی کے  کھسکنے  اور ابا جی کی قبر کی  محراب ہلنے کا کوئی  خطرہ نہیں، انہوں  نے  اپنے برسوں کے تجربے کی  بنیاد پر  ہمیں تسلی دی  اور کھدائی جاری رہی۔  یہاں تک  کہ  پہلو کی  طرف سے  ایک دوسری قبر  کے برابر جگہ  کھود لی گئی کہ  اچانک ابا جی کی قبر  کا مٹی کا تعویز کھسکا اور  کسی آئس  برگ کی  طرح پہلو کی  طرف  ڈھلک آیا ،  اتنی زیادہ مٹی کے ڈھلکنے کے جھٹکے سے ابا جی کی قبر کی  محراب (جو کے کچی اینٹوں سے بنی ہوتی  ہے) ہلی اور ہلکی سی ٹیڑھی ہو گئی۔  ساتھ ہی وہاں موجود  حاضرین کے دل بھی ہل گئے۔ بڑے بھائی  صاحب کا  اس جھٹکے سے پارہ ہائی ہو گیا  ، اور وہ حاجی صاحب پر  برس پڑے کہ حاجی صاحب  ہمیں یہی خطرہ تھا  اور اسی  لیے مشورہ دیا تھا  کہ ابا جی کی قبر سے  بھی مٹی ہٹا لی جائے ، مگر  آپ کسی کی سنتے ہی کہاں ہیں،حاجی صاحب بھی برسوں کے تجربے کو فیل ہوتا دیکھ کے ہکا بکا کھڑے تھے۔  بھائی صاحب تو سر پکڑ کے بیٹھ گئے ، جبکہ میں نے مزدوروں  اور حاجی صاحب کو تسلی دی کہ اب بہتر یہی ہے کہ قبر کے  اوپر سے  مٹی ہٹا لی جائے ، تاکہ مزید کوئی پسوڑی  نہ کھڑی ہو جائے ۔ اور مزدور  آرام آرام سے قبر کے اوپر سے  مٹی  پہلو میں کھودے گڑھے میں کھینچ کر باہر نکالنے لگے۔

جب ابا جی کی  قبر سے مٹی ہٹا ئی گئی  تو  محراب  کے اوپر  بچھائی  گئی  کھجور کے پتوں  کی  چٹائی  مٹی  میں مٹی  ہو چکی تھی  اس کے محض  نشانات  سے  محسوس ہوتا  تھا کہ  یہاں 9 ماہ پہلے  چٹائی تھی۔  محراب  کی ٹیڑھ اور  ایک جانب کو جھکاؤ واضح نظر آیا۔  اب ہمارے سامنے  دو  آپشن تھے  کہ قبر  کے ساتھ ایک  اور دیوار  محراب کی اونچائی تک  کھڑی کر کے اس پر کنکریٹ کے  بنے سلیب  رکھ دئیے جائیں ۔  یا پھر  قبرکھول کر  محراب ہٹا  لی جائے  اور محراب کی بجائے  سلیب  رکھ کے پکا کام  کر دیا جائے  تاکہ مستقبل کیلئے کوئی خدشہ  نہ رہے۔

 دونوں  آپشن میری  طرف سے پیش ہوئے اور  سب لوگ پہلے آپشن  پر فوراً متفق ہو گئے ۔ اسی دوران  ابا جی کے بڑے بھائی  صاحب کی آمد ہوئی  اور صورت حال دیکھ کر  ان کا رنگ بھی فق ہو گیا۔  اچانک  ابا جی کی قبر  کی پائنتی کی  جانب سے مٹی قبر کے  اندر  کی جانب کھسکتی  نظر آئی تو  بڑے بھائی کابلڈ پریشر کم ہونے لگا۔ ابھی اسی مخمصے میں تھے کہ  ابا جی کے  سینے  کے مقام پر بھی ایک  اینٹ نیچے کو کھسکی تو  میں نے  حاجی  صاحب  کو  قبر  کھولنے کا کہہ دیا۔   بڑے بھائی صاحب  اس وقت  کسی فیصلے  پر نہیں پہنچ پا رہے تھے اور سر پکڑ کے  ایک طرف بیٹھے تھے ، قبر کھلنے کا سن کے چچا جان ڈر کے مارے دربار  شریف پر جا بیٹھے ، اور  حاجی صاحب نے ایک بار پھر مجھے سوچنے کیلئے کہا، اور کہا کہ  پہلےکسی  مولانا صاحب سے  اس بارے  میں مشورہ     لینے کا  صائب مشورہ دیا، جس پر  خاکسار کو جلال آ گیا۔  میں نے  مولانا  صاحبوں کی ایسی  تیسی کہہ کر کہا  کہ:۔"یہ میرے والد صاحب کی قبر ہے اور میں کہہ رہا  ہوں  کہ  میرے والد صاحب اس وقت یہی چاہتے ہیں کہ قبر کھول کر  دوبارہ بنائی  جائے ۔"حاجی صاحب نے بڑے  بھائی صاحب کی طرف سوالیہ نظروں سے  دیکھا تو وہ خاموش رہے ،   اتنے میں نے ایک مزدور کو قبر کے سرہانے سے مٹی ہٹانے کو کہا اور مٹی ہٹا لی گئی ۔

 محمد  اسلم جو کہ ابا جی  کا انتہائی جانثار  عقیدت مند  ہے ،  جسے ہم مذاقاًابا  جی کا جن کہا کرتے تھے ،  جسامت میں  کسی دیو سے کم نہیں ، لیکن دل کا  ایسا کمزور  کے  قبر کھلنے کا  سن کے کانپتے  لبوں سے  کنکریٹ کے سلیب  لانے کا   بہانہ کر کے  کھسک لیا۔ اتنے  میں میرے  دوسرے دو بھائی بھی آ گئے  اور وہ بھی  دور کھڑے  ہو گئے ۔

حاجی صاحب نے  قبر کے دھانے سے اینٹیں ہٹانا شروع کر دیں  ،  اور قبر  تقریبا  9 ماہ بعد کھل گئی ۔ سب کے حلق خشک ہو چکے تھے،  کسی کی آواز نہیں نکل  رہی تھی ۔  اب  محراب  کی اینٹیں  ہٹانے  کی صورت میں قبر کے اندر مٹی گرنے کا  خدشہ تھا، جس پر میں نے تجویز دی کہ  اندر  ایک  چادر بچھا دی جائے  ، تاکہ جو بھی مٹی ، دھول وغیرہ گرے وہ چادر پر  گرے۔ تجویز  تو سب کو اچھی لگی  لیکن اس کام  کو انجام دینے  کیلئے سب کی  متفقہ نظریں مجھ پر  پڑیں۔    میں  اندر دربار  شریف میں گیا  اور  اپنے جد امجد  حضرت  مخدوم سید  محمد باغ شاہ بخاری رحمۃ اللہ علیہ  (صاحب دربار عالیہ کوٹ والا) کے مزار کا سبز رنگ  کا  بڑا  غلاف اتار لایا۔ 

 الحمد اللہ  یہ خاکسار کیلئے اعزاز  کی بات تھی  کہ  تدفین کے وقت بھی باوجود  حاضرین میں سب  سے چھوٹا ہونے  کے ،  مجھے ہی ابا جی کو قبر میں اتارنے  کی  سعادت نصیب ہوئی ، اور آج 9ماہ  بعد  بھی  ان  کی خلوت  گاہ میں مجھے ہی اترنے کی  سعادت (دوسرے لفظوں  میں اجازت) حاصل ہوئی۔

میں سرہانے کی طرف سے قبر میں اترا  اور  اندر  بیٹھ گیا،  دیکھا تو  محراب  کی  جو دو اینٹیں  کھسک کر  قبر کشائی کا  سبب بنی تھیں   وہ  وہیں  معلق تھیں، حالانکہ صرف تھوڑی سی  اٹکی ہوئی تھیں ، پھر بھی محراب اتارنے کے دوران  گری نہیں۔ اس کے بعد  میں  نے  ابا جی کی جانب توجہ کی ۔ تو   کفن کھڑکھڑاتا  ہوا ویسے  ہی سلامت  تھا،  اندر  سے  پورا جسم  صحیح  سلامت  محسوس  ہو رہا تھا۔   بائیں گھٹنے کے ذرا اوپری  جانب  کفن پر خون  کے  ایک  سکے برابر چھوٹے سے نشان  کے  علاوہ  پورا کفن  بے داغ پڑا  تھا۔ مجھے اچھی طرح یاد ہے کہ  میں دفن کے وقت   ابا جی کو  سیدھا لٹا کر نکلا تھا،  لیکن اس وقت  وہ اس انداز میں لیٹے  نظر آئے جیسے ان کی زندگی میں لیٹنے کی عادت تھی۔  قبر  جتنی  کشادہ تھی  ،  اب تو  میت پر اتنا عرصہ  گزر جانے کے  بعد جسم کے حساب سے اور  بھی کشادہ لگنا چاہیے تھا ، لیکن  میں نے دیکھا کہ  ابا جی کا  جسم بھرا بھرا  ہونے کی وجہ سے قبر بھی بھری ہوئی  لگ رہی تھی ،  اور  مجھے اچھی طرح  یاد ہے کہ تدفین  کے وقت  دونوں پہلوؤں سے  قبر  کی دیوا ر کا فاصلہ ایک ایک  ہاتھ تھا،   لیکن اب  جسم اس  اندا زمیں پڑا تھا  کہ  مجھے  پیر رکھنے  کیلئے جگہ مشکل سے مل رہی تھی  اور میرے  پیر اور  ہاتھ ان کے جسم سے لگتے ہوئے  ان کے جسم کی  حرارت تک محسوس کر رہے تھے۔  

یوں سمجھ لیں  کہ جیسے  ایک  آلتی  پالتی مارے بیٹھے بندے کو اگر  اچانک لیٹنا پڑ  جائے ۔ یعنی  دیکھنے پر  صاف صاف یہی معلوم ہوتا تھا کہ  یہ ہمارے  اندر داخل ہونے سے پہلے بیٹھے ہوئے تھے۔ کیونکہ  مجھے اچھی طرح یاد ہے  کہ  دفن کیلئے  لٹاتے وقت  ابا جان کے  گھٹنے سے گھٹنا  اور  پیر سے پیر جوڑ  کے  لٹایا  تھا، اب  دونوں پیروں کے  درمیان   ڈیڑھ فٹ کا  واضح  فاصلہ تھا اور  دونوں گھٹنوں کے درمیان  بھی کافی فاصلہ تھا۔

ابا جان کو  جگر کا کینسر  تھا، ڈاکٹرز کی پیش گوئی تھی  کہ  ان کو  وفات سے پہلے خون کی الٹیاں  آئیں گی اور وفات کے بعد بھی کینسر پھٹنے پر  خون جاری ہو جائے گا۔  ہمارا اپنا مشاہدہ بھی یہی تھا کیونکہ  اس  سے  پہلے رشتہ داروں کی وفات ہم نے دیکھی تھی ، اور  دفن تک  ان  کا خون جاری تھا ، آگے اللہ کو پتا۔  لیکن اباجی کے معاملے میں ساری پیش گوئیاں دھری کی دھری رہ گئیں ، قریباً سوا سات  بجے  شام کو وفات پائی  ، اور دوسرے دن  سوا چار بجے  اپنی قبر میں لٹائے گئے ، اور اس وقت تک میں ان کے ساتھ تھا، اور میں نے خون بہنا تو دور خون کا کوئی دھبہ بھی نہ دیکھا تھا۔  اب نو ماہ بعد  صرف ایک پانچ روپے  کے سکے کے برابر  خون کا دھبہ ان کے سفید کفن پر دیکھا ۔

خیر  یہ سب مشاہدہ  کر کے میں نے دربار شریف کا غلاف  ابا جی کے  اوپر  بچھا دیا  اور  باہر نکل آیا۔  بڑے بھائی میرے  قریب آئے اور  آنسوؤں سے لبریز  آواز میں کان میں پوچھا:۔ کیسے ہیں؟ سو رہے ہیں۔؟ میں نے جواب دیا :۔ جیسے دفنایا تھا ، ویسے  کے ویسے ہیں ، حتیٰ کے کفن  کو بھی کوئی زوال تک نہیں۔ اب تین لوگ  محراب کی اینٹیں  ہٹانے لگے اور  باقی سب  باہر نکالنے لگے۔  محراب اوپر سے پوری طرح ہٹا دی گئی۔  تو قبر کا منظر سب  کیلئے واضح ہو گیا۔  جب سلیب رکھنے کیلئے  دیوار  کی درستگی  کر لی گئی تو میں دوبارہ قبر میں اترا اور   احتیاط سے غلاف  اکٹھا کر کے باہر پکڑا دیا۔  اس کے بعد  تو سب لوگ  قبر کی طرف امڈ آئے ، اور اللہ کی  قدرت کا  اپنی آنکھوں سے نظارہ  کیا۔ میں  نے سب کے سامنے  کفن کے اندر ہاتھ ڈال کر  کفن کی اوپری  چادر جھاڑی  ، جس کی کورے لٹھے  والی کھڑکھڑاتی آواز باہر کھڑے ہر  بندے نے سنی۔   قبرستان  میں  اس  وقت  جتنے بھی لوگ آئے ہوئے تھے ، سب  یہ نظارہ دیکھنے آنے  لگے اور دیکھ کر بے اختیار درود شریف کا ورد  کرنے لگ جاتے۔

کمال کی بات  یہ  تھی کہ  کفن کے بند  (کپڑے کا ایک پٹی نما عمودی ٹکڑا، جسے بعدمیں دفن کے وقت کھول دیا جاتا ہے) جو ابا جی  سے الگ ایک طرف پڑے تھے ، وہ مٹی میں  گل کر  مٹی ہو چکے تھے،  سوائے اس تھوڑے سے سرے کے جو  ابا جی کے  کفن کے  ساتھ مس ہوا پڑا  تھا بالکل صحیح سلامت تھا۔ 

 بے شک اس میں عقل والوں کیلئے  بہت سی نشانیاں ہیں۔

اس کے بعد  میں باہر آیا اور  کنکریٹ کے  سلیب  رکھ کے قبر کو  دوبارہ بند  کر دیا گیا۔  اوربقیہ  کام  معمول کے مطابق جا ری رہا۔

میں کوئی عالم نہیں کہ علمی نکتوں یا فقہی  مسائل پر  بحث کروں  اور  فروعی  باتوں پر مناظرے کروں  ، میں ایک سادہ سا مسلمان ہو ں ، جو  اپنے مشاہدے  کے بل بوتے پر  یقین سے کہتا ہے کہ  یہ شاندار  انجام  ، یہ  پر شکوہ  نظارہ ءِ  قبر اس شخص کا  تھا  جو حقیقی  معنوں میں  غلامِ  رسول اللہ صلی اللہ علیہ وسلم تھا، یہ  انجام ایک  میلاد منانے  والے اور کثرت سے درود شریف پڑھنے والے  کا  تھا۔  جن کی قبر کشائی  کا  احوال آپ نے پڑھا  ،  وہ  باقاعدگی  سے ہر ماہ کی گیارہ تاریخ کا دن اور  بارہ تاریخ کی شام  کو  گیارہویں  شریف کی محفل کا  انعقاد کرتے تھے ،  اور وہ ان کی وفات کے بعد  بھی جاری و ساری ہے۔

سائنس  کہتی ہے  کہ دفن کے 78 گھنٹوں  کے اندر اندر  قبر کے اندورنی حبس اوردباؤ  کی تاب نہ  لاتے ہوئے  میت   پوری طرح پھٹ جاتی ہے ۔  لیکن  میں نے  آپ  کو 78 نہیں کم وبیش 9 ماہ     بعد  کا  نظارہ دکھایا  ہے۔ جھوٹ سچ  اللہ  بہتر جانتا ہے۔

جو بھی تیرے فقیر ہوتے ہیں

آدمی بے نظیر ہوتے  ہیں

مکمل تحریر >>>

بچھڑا کچھ اس ادا سے۔۔۔ ۔ (آخری قسط)۔

جمعرات 12جمادی الاول، بمطابق  13 مارچ  2014 کی سہ پہرتقریباً سوا چار بجے والد محترم  جناب سید ممتاز  حسین  بخاری  کو  ان کی والدہ محترمہ کے  پہلو میں واقع ان  کی آخری آرام گاہ میں اتارنے کا شرف  خاکسار (جوگی) کو  حاصل ہوا۔

اس کے بعد  روزانہ  صبح کی نماز کے  بعد   ان کی قبر پر  تلاوت  کرنا اور  پھول ڈالنا میرا معمول ہو گیا۔  تدفین کے  دوسرے دن صبح  جب تلاوت  اور  ختم سے فارغ ہو کر  میں لوٹ ہی رہا تھا  کہ  دو آدمی  قبرستان  میں داخل ہوئے ،  اور مجھ سے پوچھا  کہ  پیر ممتاز شاہ صاحب کی قبر  کونسی ہے۔؟ میں نے  ہاتھ کے اشارے سے بتایا  تو اس  نے مجھ  سے  دریافت  کیا کہ آپ  ان کے کیا لگتے ہیں، میں نے  بتایا کہ خاکسار ان کا چھوٹا  بیٹا ہے۔ اس  پر  اس نے میرا ہاتھ تھام لیا  اور مجھ سے  معذرت کی  کہ  میں عمرے  پر گیا ہوا تھا اور  ابھی کل ہی  واپسی ہوئی ہے ۔  مجھ سے جنازے میں شرکت  سے محرومی  پر افسوس کا اظہار کیا  اور  ہم  چلتے چلتے ان کی قبر تک  آ پہنچے۔

قبر کے پاس پہنچ کر اس نے میری طرف دیکھا  اور کہا  کہ  یہ اس  وقت مدینہ منورہ  میں  ہیں۔ میں  نے اس کا حسن عقیدت سمجھ  کر محض مسکرانے پر  اکتفا کیا، لیکن اس نے مزید جو کچھ بتایا  وہ  سننے اور لکھنے لائق تھا۔

اس نے بتایا  کہ  عمرے پر  روانہ ہونے   سے پہلے جناب سید باقر  شاہ صاحب (میرے ماموں زاد بھائی) کے پاس حاضر  ہوئے۔  انہوں  نے فرمایا کہ  آپ ہمارا سلام لے جائیں  اور حرم شریف میں آپ  کی ملاقات  میرے  دادا جان سید باغ علی  شاہ  بخاری رحمتہ اللہ علیہ (راقم کے نانا جان) سے ہو گی ، انہیں ہمارا سلام پہنچا دیجئے  گا۔  راوی کا کہنا تھا کہ  سننے  میں یہ بات مجھے بہت عجیب  لگی لیکن پاس ِ ادب سے  کسی چوں چرا کی بجائے میں نے حامی بھر لی۔ لیکن دل  میں مجھے پریشانی  تھی کہ ہم مرحوم  پیر صاحب تک  سلام کیسے پہنچائیں گے۔  ایک  دن حرم شریف  میں طواف کے بعد  جب میں سستانے  کیلئے  ایک  ستون سے ٹیک لگا کر  بیٹھا  کعبہ  کو دیکھ رہا تھا کہ  اچانک کسی نے میرا کندھا ہلا کر  مجھے اپنی طرح متوجہ کیا۔ سر اٹھا کر  دیکھا تو قبلہ  سید باغ علی  شاہ صاحب  کھڑے تھے ۔ بقول اس کے ، قبلہ پیر صاحب کو اپنے  پاس دیکھ کر  میں ہکا  بکا رہ گیا اور  کچھ  سمجھ  نہ آیا کہ  کیا  کروں کیا  کہوں ، یہاں تک  کہ انہوں نے  خود ہی فرمایا کہ میرے  پوتے نے  جو میرے لیے پیغام بھیجا ہے  وہ بتاؤ۔  میں نے ادب  سے  ان کا سلام پہنچایا اور جواب  میں وہ  بھی سلام  کہہ کر ایک طرف چلے گئے۔ اور کل میں واپس آیا ہوں آج صبح  صبح قبلہ پیر صاحب کے مزار پر  حاضری دینے آیا ہوں ۔  اس کے  بعد راوی نے  دوبارہ میرے  والد صاحب کوباقاعدہ مخاطب کر کے  کہا  کہ :۔" مجھے یقین ہے آپ اس وقت مدینہ منورہ میں ہیں۔" اس کے بعد  انہوں نے  ایصالِ ثواب کیا  اور  وہاں سے  قبلہ نانا جان کے مزار کی طرف چل پڑے  اور خاکسار نے گھر لوٹ  کر اماں جان کو ان کے والد صاحب  کی تازہ ترین کرامت سنائی۔

اتوار 16  مارچ  2014 کو  قل خوانی کا  اہتمام تھا۔  حسب الحکم  اوپن ایئر انتظام کیا گیا۔  تقریباً چار کنال  کے رقبہ  پر دریاں  بچھائی گئیں،  لیکن  تمبو کنات نہیں لگائے گئے۔  9 بجے کے بعد  جوں جوں  سورج بلند ہوتا  گیا گرمی بڑھتی گئی ۔ مجھ سمیت  بڑے بھائی کو یہ پریشانی  تھی کہ  11 سے 12 بجے تک  کس طرح لوگ اتنی گرمی میں بیٹھیں گے۔ لیکن  مجبوری یہ تھی  کہ  ابا جان کا حکم تھا کہ  شامیانے  قناتیں نہ لگائے جائیں ۔  جن لوگوں کو  یہ وجہ معلوم نہیں  تھی  ان کے خیال میں شاید ہم کنجوسی  کی وجہ سے شامیانے  وغیرہ نہیں لگوا رہے۔ حتیٰ کہ میرے  ماموں  سید کاظم مسرور بخاری نے اپنی ناراضگی کو اظہار بھی کیا اور کہا کہ اگر خرچے کا مسئلہ  ہے تو مجھے بتائیں لیکن عین دوپہر کے وقت لوگ کس طرح بیٹھیں گے۔  انہیں جواب ملا کہ  جن  کا  یہ  حکم ہے وہ  جانیں اور ان کی  قل خوانی جانے ، ہم نے تو بس حکم کی تعمیل  کی ہے ۔

اور الحمد اللہ  اس قدر تعداد میں لوگ آئے  کہ چار کنال  پر بچھی دریاں  کم پڑ گئیں  ، اور دوبارہ  65 دریاں مزید منگوائی گئیں۔ 

جونہی  پرو گرام شروع ہوا  تو سب نےدیکھا کہ  مغرب  کی جانب سے بادل کا ایک  بڑا سا ٹکڑا  رینگتا ہوا  آیا اور  پنڈال پر ٹھہر گیا۔  ہماری جان میں جان آئی اور لوگوں کیلئے دھوپ سے  بچاؤ کا  قدرتی انتظام ہو گیا۔ 

نعت خوان حضرات  کثیر تعداد میں آئے ہوئے  تھے،  ہر ایک کو زیادہ سے زیادہ  دو منٹ  کا وقت دیا جاتا  رہا،  سب سے  آخر میں ابا جان کے پسندیدہ نعت  خوان  ، حاجی  عطا محمد  صاحب  کو  فری ہینڈ دیا  گیا  ۔  اور  حاجی صاحب  کا  یہ حال تھا  کہ نعت پڑھتے پڑھتے ہچکیاں  لگ جاتیں۔  اس کے بعد  میرے  چچا زاد  بھائی  سید ضمیر  حسین  بخاری خطاب کیلئے کھڑے ہوئے ،   موت اور اس کے متعلقات پر تھوڑی سی روشنی ڈالنے کے بعد  جب مرحوم  کا  ذکر چھڑا  تو ہجوم میں آہ و بکا  کی آوازیں  وقفے وقفے  سے  بلند ہوتی رہیں ،  لوگ  دھاڑیں مار مار  کے روتے رہے ،  اس دن  مجھے ابا جی کی  سربستہ  زندگی کا  ایک  اور  راز پتا چلا،  صرف مجھے ہی نہیں ہم سب بھائیوں پر یہ راز اس دن منکشف ہوا۔  راوی  بیان کرتے ہیں، کہ  جب ہم عمرے پر  روانہ ہونے لگے تو  مرحوم  نے  ایک  مہر بند  رقعہ  میرے  حوالے کیا اور فرمایا  کہ یہ امانت  مدینہ منورہ  پہنچا دیجئے گا۔ مدینہ منورہ جب ہماری حاضری ہوئی  تو  مجھے وہ رقعہ رکھنے کیلئے  کوئی مناسب جگہ نہ ملی تو  میں نے  روضہ مبارک  کے  ساتھ پڑے قرآن مجید  کے ڈھیر  کے نیچے وہ رقعہ  رکھ دیا ۔

(اس دن شام کو  جب اماں جان سے اس بات کی تصدیق  چاہی تو اماں نے ہمیں  پہلی بار  یہ بتایا کہ  ہاں انہوں  نے  آنجناب  رسول اللہ  صلی اللہ علیہ وآلہ  وسلم کے نام ایک  رقعہ لکھا تھا ، اور جس کیفیت میں لکھا تھا  اسے  لکھنے  سے راقم قاصر ہے )

ٹھیک 12  بجے ختم  پڑھا  گیا اور  بھائی کی دستار  بندی ہوئی ،  اور  کھانا  تقسیم ہونے لگا۔  بریانی اور زردہ  اس قدر  زبردست  بنا ہوا تھا کہ  لوگوں نے جی بھر کھایا اور اپنے ساتھ بھی تبرک کے طور پر لے گئے ۔

ایک صاحب  نے بعد میں روایت  کیا کہ  "میرا  بیٹا  شدید  بیمار تھا ،  اس دن قل خوانی میں جو لنگر بانٹا  گیا ، اس کا کچھ حصہ میں اپنے ساتھ بطور تبرک لے  گیا اور بیٹے کو کھلایا ۔  اور  میرا بیٹا جو کئی سالوں  سے  بیمار تھا اور ڈاکٹرز جواب  دے چکے تھے ، اب الحمد اللہ  وہ بالکل صحت مند ہے۔"

اللہ والوں کے راز اللہ ہی بہتر جانتا ہے۔

بچھڑا کچھ اس ادا سے کہ رُت ہی  بدل گئی

اک شخص  سارے شہر کو  حیران کر گیا

جانے  والے تو چلے گئے  لیکن دنیا کا چلن بھی بدل گئے ۔  ان  کی وفات کے بعد  خاکسار  نے  بہت  کچھ  بدلتا دیکھا  ہے۔  کچھ ایسا بدلاؤ جس  کا سوچنا  بھی نا ممکن تھا، لیکن وہ ممکن دیکھا ہے۔

لوگوں کو  اب  خدا  یاد آ گیا ہے ۔ لوگوں کو اب موت یاد رہنے  لگی ہے۔

لوگ  اب موت کی تیاری  دل  سے کرتے پھرتے ہیں۔

جسے دیکھو وہی  اپنا کفن  تیار  کروا رہا ہے۔ ہر  دس میں سے پانچ  افراد اپنی زندگی میں اپنی قبریں تیار کروا  رہے ہیں۔  علماء جب بھی تقاریر  میں موت کا ذکر کرتے ہیں ،  تو ان کا نام  لازمی لیتے ہیں۔  غرض کہ ان کی وفات جیسے وسیب کیلئے ضرب المثل بن گئی ہے۔

دور  ، دور سے لوگ  ان کا  صرف ذکر  سن کر ان کی  قبر پر فاتحہ  خوانی کیلئے آتے ہیں۔ ابھی  حال  ہی کا واقعہ ہے ۔  جو کہ وقوعے کے دو دن  بعد  مجھے معلوم ہوا۔

(دروغ بر گردن راوی)

16  مارچ  2015 کو  ایک  فیملی مزار پرحاضر  ہوئی ۔  ان کی کمسن بچی پر  جنات کا  قبضہ تھا۔  بچی کے والدین نے ہر طرح کا علاج کروایا ، عاملوں  ،پیروں فقیروں  کے  پاس چکر لگائے ، لیکن بے سود۔  بچی کے والد  (جو کہ  سید ممتاز حسین بخاری   رحمۃ اللہ  علیہ کا مرید بھی نہیں) نے اپنے پیر صاحبان  کے پاس جا کے فریاد کی ، جب حاضرات کا عمل کیا گیا ، تو  (بقول ان کے) قابض جن نے کہا  کہ  یہ سید  ممتاز حسین  بخاری کی  مریدنی ہے  ،  اس لیے  اب تک زندہ ہے۔  آپ ان کے مزار پر حاضری دیں ، ہم چھوڑ دیں گے۔  اور پھر  وہ  سب  مزار  پر حاضر ہوئے ۔ اب  وہ بچی بالکل ٹھیک  ہے ۔ 

اس کے علاوہ  اور بھی بہت سے واقعات ہیں ، جو  ہم تک لوگوں کی زبانی پہنچتے ہیں۔  اور ہماری حیرانی  در حیرانی کا سبب بنتے ہیں۔

نام فقیر انہاں  دا باہوؒ،  قبر جنہاں  دی جیوے ہو۔۔۔ 

مکمل تحریر >>>

چلتے ہو تو لاہور کو چلیے (قسط پنجم)۔

انتظار گاہ میں بڑی سی "ایل سی ڈی" پر ٹیسٹ میچ دکھایا جا رہا تھا۔ اور کرکٹ کے نشئی  مکھیوں کی طرح آنکھیں لگائے بیٹھے تھے۔ مجھے کرکٹ سے تو ویسے بھی دلچسپی نہیں رہی کجا کہ ٹیسٹ میچ دیکھنا۔

ارسل اور افی صاحب تک  بذریعہ ایس ایم ایس اطلاع پہنچائی ، جواباً افی صاحب کی کال آ گئی۔ انہوں نے مجھے خوش آمدید کہا اور پوچھا ارسل کی کوئی خیر خبر؟ میں نے بتایا کہ جناح ٹرمینل سے نکلتے وقت اس سے بات ہوئی تھی ، تب اس نے ساڑھے چھ کا لارا دتہ تھا۔ ازاں بعد  کوئی اتا پتا نہیں ۔

یہاں ایک ابہام کا ازالہ ضروری ہے ورنہ افی صاحب کی خوئے مہمان نوازی پہ حرف آنے کا  خطرہ منڈلاتا رہے گا۔

صاحبو !!! تفصیل اس اجمال کی یوں ہے کہ افی صاحب ان دنوں اے آر وائی زندگی چینل پر آن ائیرسوپ سیریل "بہنیں ایسی بھی ہوتی ہیں" کی تکمیل میں مصروف تھے ، محاورتاً نہیں بلکہ حقیقتاً انہیں سر کھجانےکی بھی فرصت نہیں تھی۔ لکھنے لکھانے والے خوب جانتے ہیں کہ لکھنے کا عمل وحی کے عمل جیسا ہوتا ہے۔ یکساں اسراع  سے لکھتے لکھاری پر اگر کوئی بیرونی قوت  مداخلت کرے تو اس کا نتیجہ اچھا نہیں نکلتا۔

اب یہ تو افی صاحب کی بندہ پروری اور دلنوازی  ہے کہ اس مصروفیت کے عالم میں بھی انہوں نے مجھ سے ملاقات طے کر لی۔ حسنِ اخلاق کی اس سے اچھی مثال شاید ہی کوئی ہو۔ پانچ بجے تک  ان کا لکھنے کا وقت تھا ، اس کے بعد داستان سرائے جانا تھا جہاں ادبی نشست تھی۔ اور   ہمارے درمیان یہی طے پایا تھاکہ میں پانچ بجے شام تک ہی لاہور پہنچوں گا۔ بقول غالب:۔ "وائے دیوانگیِ شوق" کہ میں ساڑھے تین بجے ہی لاہور میں تھا۔ پس ثابت ہوا کہ اس میں افی صاحب کا کوئی قصور نہ تھا کہ وہ میرے استقبال کو نہ پہنچے تھے۔ بلکہ میں ہی مقررہ وقت سے پہلے پہنچ گیا تھا۔

اب خاکسار کے پاس مبلغ ڈیڑھ گھنٹہ فرصت کا تھا، جسے میں نے " تصورِ جاناں کیے ہوئے" بیٹھنے کی بجائے ادھر ادھر تاڑا تاڑی شروع کر دی۔ لیکن  جیسا کہ بھیدی لوگ جانتے ہیں یہ بھی ایک دقیق  فن ہے، جس میں کہ فدوی کورا پایا گیا۔ اس لیے جلد ہی اس شغل سے اکتا کر اور پڑھنے کیلئے کوئی کتابی چہرہ  نہ پا کر مجبوراً ایل سی ڈی کی طرف ہی منہ کر لیا۔ میری اس حرکت سے یونس خان کواس قدر خوشی ہوئی کہ اس نے  دوسری گیند پہ چھکا لگا دیا۔ صرف اسی پہ بس نہیں اس کے چند گیندوں بعد ایک اور چھکا ، پھر ایک چوکا اور پھر ایک اور چھکا۔ اپنی اس کرامت کا اگر پہلے ہی اندازہ ہوتا تومیں آتے ہی میچ دیکھنے لگ جاتا ۔

خیربھاگتےچور کی لنگوٹی سہی ۔ یونس خان کا بلا رنز اگلتا رہا اورجوگی کا وقت اچھا گزرتا رہا۔  فلک کج رو سے یہ برداشت نہ ہوا تواس نے سورج  کو متحدہ عرب امارات میں "شام ہوگئی ہے" کا نوٹس دینے پہ اکسایا۔ شام ہوئی اور پاکستان نے اننگزڈیکلیئر کر دی۔ مجھے کونسا فرق پڑنے والا تھا، میچ نہ سہی خبریں ہی سہی۔

ادھر افی صاحب نے لکھتے لکھتے سوچا کہ وہ بے چارا اتنی دور سے آ کر اڈے پہ رُل رہا ہے، اگرآج یہ قسط مکمل نہیں ہوتی تو کونسا کعبے کو کنڈ ہوجائے گی۔  یہ سوچتے ہی ان سے بیٹھا نہ گیا، تو کار لے کے آ گئے اور مجھے کال کی ، باہر آ جا  جھوٹے غالب، میں رہبر  ٹریولز ٹرمینل کے سامنے کھڑا ہوں۔ میں باہر نکلا سڑک پارکی ، اور ادھر ادھرنظریں دوڑائیں ، مگر افی صاحب نظر نہ آئے ، میں نے آگے بڑھ کے دیکھا تو ایک لمبی سی بس کےپیچھے سفید رنگ کی خیبر کھڑی نظر آئی۔

افی صاحب سٹیرنگ پہ ہاتھ رکھے جھک کر ادھر ادھرجھانکتے مجھے ڈھونڈنے میں مصروف تھے۔  میں نے ہاتھ کا اشارہ کیا تو چہرے پہ دلفریب مسکراہٹ ابھرآئی۔اتنے میں، میں کار کے پاس پہنچ چکا تھا۔ دروازہ کھولنے لگا تو افی صاحب نے کہا ایک منٹ رکو۔ کار سے باہر نکلے اور مجھ سے بغلگیر ہو گئے۔

یہ ہماری پہلی ملاقات  تھی ۔

(جاری ہے....) ۔

مکمل تحریر >>>